Mipatay og polis sa Lapu-Lapu nadakpan

CEBU, Philippines - Gunman nga mipatay sa polis nga sakop sa Lapu-Lapu City Police Office nadakpan na sa kapolisan.

Ang gidakop mao si Virgilio Franco, Jr. 53-anyos  usa ka electrician  nga taga Barangay Buaya kinsa nadakpan sa joint operation sa City Intelligence Branch Unit ni Police Senior Inspector Rogelio Pineda sa LCPO kauban ang hepe sa Mactan Police Station nga si PSI Verniño Noserale ug ang sakop sa tourist police sa dakbayan.

Usa ka litrato sa biktimang si Police Officer 3 Romel Gilig nga gi-print sa usa ka bond paper nga adunay sketch sa likod niini nga nagpakita sa balay sa biktima diha sa Sitio Bukid-Bukid sa Barangay Pajac ang nasakmit gikan kang Franco.

Ang hepe sa Mactan Police Station nga si PSI Verniño Noserale nakadawat og tawag gikan sa concerned citizen nga nagpahibalo bahin sa usa ka lalaki nga kadudahan og lihok nga nag-parking diha duol sa Mactan Electronic Company sa dalan  Humay-Humay sa Barangay Gun-ob.

Pag-abot sa mga polis sa nahisgutang dapit ilang naabtan ang suspetsado apan misulay kini og ikyas ug gilabay ang sling bag niini apan naabtan gihapon kini sa mga polis.

Diha sa sling bag nakit-an ang usa ka .357 revolver nga adunay upat ka bala ug duha ka basiyo niini, usa ka granada, usa ka litrato ni PO3 Gilig ug sketch sa balay niini, usa ka cellphone unit ug motor.

Matud pa ni Radoc positibong gitumbok sa mekaniko ni Gilig nga maoy nagpatay sa iyang agalon niadtong gabhiuna.

Apan ang suspek miinsister nga usa lang siya ka electrician ug dili maoy nagpatay sa biktima. (Christell Fatima Tudtud/EIM)(BANAT NEWS)