Wa napolis nangawat, kauban sikop

CEBU, Philippines – Usa ka kanhi aplikante pagkapolis nahimong tulisan ug akyat-bahay nadakpan uban sa iyang kauban atol sa checkpoint diha sa Barangay Lahug ning dakbayan sa Sugbo.

Ang mga sakop sa Investigation Detection and Management Branch (IDMB) sa Cebu City Police Office misikop nila ni Juriel Lachica, 18, ug Yasser Dinilogun, 28, taga Barangay Lahug nga gipasanginlang mikawat sa tangke sa LPG sa radio anchorman nga si Arnold Bustamante.

Ang duha naaresto sa mga sakop sa IDMB nga tayming ‘sab nga naghimo og checkpoint nianang kaadlawon.

Matud pa ni Superintendent Alet Virtucio ang deputy chief sa Cebu City Police Office nga tulo na ka higayon nga nadakpan sa kasong pagpanulis si Lachica. Ang duha ka mga lalaki sakay sa usa ka skeleton nga motorsiklo nga walay plaka, walay signal lights, walay side mirror, lanog kaayo og tambutso, ug ang duha walay helmet ug nagtsinelas.

Nakuha sa kapulisan gikan sa mga dinakpan ang usa ka .45 caliber pistol nga duna’y upat ka mga bala.  Narekober sab sa kapulisan ang mga ID’s sa mga supek, mga cellphone, pitaka, mga resibo sa prenda ug laptop nga Apple. Si Dinilogun gradwado sa kursong Criminology, pasado na sa exam, kanhi aplikante sa pagkapolis apan nahagbong sa physical exam.

Gibanabanang P200 mil ang kantidad sa mga butang nga sulod sa bag sa duha ka mga dinakpan.  Plano sa kapulisan nga subayon ang mga resibo diin giprenda sa mga suspetsado ang nakuha nila nga mga gamit. – /EIM) (BANAT NEWS)