Taxi drayber nanulis nasundan sa polis

CEBU, Philippines - Wala’y suwerte ang usa ka taxi drayber nga nanulis sa duha ka Hapon nga pasahero gamit ang toy gun kay nasundan og patrol car sa polis.

Ang insidente nahitabo pasado alas 11 sa gabii niadtong Domingo, sa dalan M. Velez, Guadalupe, Cebu City.

Ang nasikop sa kapolisan mao si William Quiñones, 32, ulitawo nga taga Tungkil, Minglanilla kinsa igo lang mirelibo sa tinuod nga drayber sa Tiger taxi.

Ang iya untang tulison mao sila si Hitomi Hasashima ug Genki Hirano, pulos hingkod.

Matud ni PO3 Eric Jacalan, desk officer sa Guadalupe Police Station, nga nahinabi sa Banat News nga kalit lang mihunong ang taxi sa maong lugar dayon tion sa drayber sa “toy gun” sa duha ka langyaw.

Gumikan sa pagtuo nga tinuod ang armas, wala na mipalag ang duha ka Hapon ug gamit ang scotch tape sa suspetsado sa paghigot sa kamot sa duha niya ka pasahero ug gipangkapkapan ang duha ka langyaw.

Ang drayber sa usa ka taxi nga nakasunod sa gisakyan sa mga biktima ang nakabantay nga dunay dili maayong gihimo ang suspek ang dali nga mitug-an sa nagsunod nga Mobile Patrol Group nga may sakay nga duha ka polis.

Dali nga nasikop ang suspek sa duha ka mga polis ug gidala sa Guadalupe Police Station.

Nakuha sa kapulisan gikan ni Quiñones ang usa ka replica sa .45 caliber nga toy gun ug usa ka kutsilyo.

Gitanggong na sa Guadalupe Police detention cell ang drayber kinsa gikatakdang pasakaan og kasong robbery karong adlawa. (BANAT NEWS)