Calamity fund sa siyudad P7M na lang

CEBU, Philippines - Ang kagamhanan sa dakbayan sa Sugbo duna na lang kini P7 milyones nga nahabilin sa pundo sa calamity fund.

Si Konsehal Sisinio Andales mibutyag nga dili pwedeng ihurot dayon og hatag ang nahisgutang pundo tungod kay wala pa matapos ang tuig ug panagana usab kini kung duna pa’y laing mga kalamidad nga maabot.

Tungod sa grabeng baha sa niaging adlaw, ang dakbayan sa Sugbo gideklarar ubos sa state of calamity aron magamit dayon ang calamity fund.

Matud ni Andales nga naghuwat sila sa rekomendasyon sa Local Disaster Risk Reduction and Management Council (LDRRMC) kung asa dapita ang angayang i-priority nga apektadong lugar.

Gipasabot ni Andales nga dili pagpanghatag og mga pagkaon ngadto sa pamilyang naapektohan sa baha ang ilang himuon kun dili susihon nila kung ang mga kanal ug creek sa lugar kinahanglan ba nga i-rehabilitate.

Matud ni Andales nga ang P7 milyones nga pundo dili na paigo alang sa pagsulbad sa problema sa baha.

Gibana-banang mokabat sa P300 milyones ngadto sa P500 milyones ang angayang budget sa pagsulbad sa problema sa baha sama sa pag-ayo sa drainage.

Ang siyudad adunay P500 milyones nga gahin alang sa drainage project apan ang P300 milyones gi-realign alang sa katukuran sa bag-ong Cebu City Medical Center (CCMC).

Nunot niini, si Bise Mayor Edgardo Labella nagkanayon nga usa sa magamit mao ang P200 milyones nga pundo gikan sa general fund alang sa emergency for disaster.

Si Labella nagkanayon nga kinahanglang ma-rehabilitate ang mga tulay diin usa sa tumong niini mao ang pagpreserba sa heritage tungod kay dunay mga tulay nga natukod sa dugay na’ng katuigan.

Gawas niini, papahawaon usab ang mga illegal settlers ug tangtangon ang mga illegal structures diha sa mga tulay aron ang tubig makaagi. (Brenda D. Batuto/GMR)(BANAT NEWS)