15-anyos napagan sa pagpamusil
CEBU, Philippines - Naangol ang usa ka 15- anyos nga lalaki kinsa biktima sa pagpamusil alas 2 pasado kagahapon sa kaadlawon sa barangay Subangdaku, dakbayan sa Mandaue.
Ang biktima mao si Angelo Camanse, taga sitio Fatima sa maong lugar samtang nailhan ang mga suspetsado nga sila si Ramil Iliot ug Richard Casao nga mga guwardiya sa Petro Logistics nga nahimutang sa maong dapit.
Si SPO1 Michael Limalima sa Presinto 2 sa Mandaue City Police Office (MCPO) miingon nga nagsakay og biseklita ang mga suspetsado nga naggukod sa usa ka tawo nga nailhan sa angga nga Ike.
Matud ni Limalima nga si Ike nga nagdagan nagsunod usab sa biktima nga naglakaw sa maong dapit dihang gipusil sa mga suspetsado.
Dugang ni Limalima nga misutoy sa pagdagan si Ike ug ang biktima nga si Camanse ang napagan ug naigo sa iyang paa.
Si Limalima miingon nga dali nga gidala sa Mandaue City Hospital ang biktima ug ang mga suspetsado ilang gipaabot nga motahan ngadto sa ilang buhatan alang sa imbestigasyon nga pagahimoon alang sa pagsuta sa hinungdan sa gihimo nilang pagpamusil. (BANAT NEWS)
- Latest
