Inahan nga pusher naka-eskapo, anak nasikop

CEBU, Philippines- Naka-eskapo sa buy-bust operation sa kapolisan ang pusher nga inahan ug gidala pa sa pagdagan ang P200 nga marked money nga gigamit sa pagpalit og shabu apan ang 24-anyos nga anak lalaki ang nadakpan ala una sa kaadlawon niadtong Martes sa sitio Suba, Poblacion, Lungsod sa Consolacion.

Si PO2 Raymund Almonicar miila sa naka-eskapo nga si Charina Melgar ug ang nadakpan mao  si Aldrechs Melgar, ulitawo, nagpuyo sa maong dapit.

Si Aldrechs nga nakalitan sa pagtumaw sa mga polis misunod unta sa pagdagan apan nagunitan kini sa misugat nga mga polis ug dali nilang giposasan.

Ang usa ka paketeng shabu nga itunol unta ni Aldrechs sa poseur  buyer  maoy nakuha sa mga polis ug dihang ilang girikisa maoy ilang nakuha ang dugang walo pa ka gagmay’ng pakete, lima ka tin foil ug plastic container nga gituohang sudlanan og shabu.

Samtang laing pusher nga si Efren Cedino, 34, taga Asinan, Mantuyong, dakbayan sa Mandaue ang nakuhaan usab og walo ka gagmay nga paketeng shabu sa buy-bust operation sa kapolisan sa maong dakbayan nga gipangulohan sa ilang hepe nga si Chief Insp. Jimmy Aguisanda. - /GMR) (BANAT NEWS)