Pushers sa Consolacion, Talisay sikop

CEBU, Philippines- Nadakpan ang duha ka tawo sa dungan nga buy-bust operation nga gihimo sa kapolisan sa Sitio Bagacay, Barangay Tayud, lungsod sa Consolacion alas 5 pasado sa hapon niadtong Sabado.

Si PO1 Albert Jimenez sa Consolacion Police Station miila sa duha nga nadakpan nga sila si Harold Comendador Harmian, 24 ug Herman delos Reyes Maquilan, 23, pulos ulitawo ug nagpuyo sa maong dapit.

Sila si PO2 Glenn Rosal, PO1 Julius Patac ug PO1 Ernie Barba maoy gitahasan sa pagpaniid sa kalihukan sa mga suspetsado ug nasuta nga positibo human sa kapin sa usa ka semana.

Nakuha gikan sa mga dinakpan ang usa ka paketeng shabu nga gitunol bugti sa P200 ug laing duha pa ka pakete human sa pagsikop sa mga suspetsado.

Samtang nasikop usab ang giingong notadong drug pusher pinaagi sa buy-bust operation sa Sitio Lower Crusher, Lawaan 3, dakbayan sa Talisay niadtong Sabado sa hapon.

Ang dinakpan naila nga si Ramil Matadero, 32, ulitawo ug nagpuyo sa maong lugar.

Nakuha sa posesyon sa dinakpan ang walo ka gagmay nga pakete ug usa ka medium size sa gituohang shabu nga dunay kantidad nga P60 mil.

Matud ni PO1 Joseph Bejer sa Talisay City Police Station nga nahinabi sa Banat News nga nakalista sa ilang buhatan ang pangalan ni Matadero nga usa gyud sa mga drug pushers sa maong lugar.

Gitanggong na sa Talisay detention cell ang dinakpan nga gikatakdang pasakaan og tukmang kaso. - /GMR) (BANAT NEWS)