Kaso vs nagbaligya’g ihalas nga mga langgam ipasaka na ugma

CEBU, Philippines - Giandam na sa Department of Environment and Natural Resources (DENR)-7 ang kaso batok na sa duha ka mga tawo nga nasakpang namaligya og langgam nga agila ug banog sa Barangay San Roque sa siyudad sa Talisay atol sa gipahigayon nga buy-bust operation sa hiniusang pwersa sa DENR-7 ug Kapitolyo niadtong  Huwebes.

Ang tigpamaba sa DENR-7 Eddie Llamedo, nagkanayon nga dili mapasaylo ang nahimong salaod nila ni Stephen Ng Sy, 34, ug Alberto Primor, 27,  ug  ilang ipasaka ang kaso batok sa duha ugmang adlawa  diha sa Talisay City Prosecutors Office.

Nakuha gikan sa duha mao ang unom ka Umbrella Cockatoo, duha sa Philippine Hawk Eagle, usa ka sa Crested Serpent ug usa ka Brown Dove nga ilang gisakay sa kolor blue nga Toyota Revo nga may plate number WKP-241.

Sigon pa ni Llamedo nga kalapasan sa Republic Act Number 9147 kon Wildlife Resources Conservation and Protection Act ang ilang ipasaka batok sa duha ka dinakpan sa sunod semana. Suma pa ni Llamedo nga dugay nang gipanid-an sa ilang buhatan ang duha kinsa napakyas sa pagpakita og mga papeles nga nagmatuod nga legal ang ilang negosyo nga pagpa-maligya og mga ihalas nga mananap.  (BANAT NEWS)