Wholesaler og ballot gipatay atubangan sa asawa

CEBU, Philippines -  Patay na nga naabot sa tambalanan ang usa ka wholesaler og balot human kini gipusil samtang nagtupad sa iyang asawa alas 10:30 sa miaging gabii  diha sa kilid sa kapilya sa Greenside, Hipodromo ning dakbayan sa Sugbo.

Ang biktima giila nga si Mitchele Rallos Sr., 54,  nagpuyo sa maong dapit. Samtang wala pa mailhi sa kapolisan ang lalaking way taptap sa nawong nga nag-inusara luwan sa usa ka motorsiklo.

Ang asawa sa biktima nga si Violeta, misaysay nga naglingkod sila sa iyang bana dihang usa ka motor nga mihunong sa ilang duol ug dayon gipusil iyang bana sa makadaghan nga higayon.

Naigo sa nagkadaiyang parte sa lawas si Rallos kinsa daling gisakay sa taksi sa iyang silingan ug gidala sa Cebu Doctors Hospital apan gi-deklara kini nga dead on arrival.

Nakuha sa kapulisan sa crime scene ang unom ka basiyo sa .45 kalibre nga bala ug duha ka deformed slug.

Sumala pa ni Dacua nga sa kadaghan sa basiyo nga nakuha nila sa crime scene walay plano ang kriminal nga buhion si Rallos.

Si SPO4 Alex Dacua, ang imbestigador nga nagkupot sa kaso mibutyag nga lakip sa ilang gisubay ang mga impormasyong ilang nahipos nga atraso ug drugas ang nagpaluyo niini.  (BANAT NEWS)