DENR moimbestigar kabahin sa“illegal structures” sa Bantayan

CEBU, Philippines - Ang Department of Environment and Natural Resources (DENR) 7 niumol og nine-member team alang sa pagpahigayon og usa ka semana nga imbestigasyon kalabot sa gikatahong pagtukod og mga illegal structures ug ingon man mga konstruksyon sa pipila ka mga beach resorts nga nasulod sa 20-meter easement zone sa Bantayan Island.

Si DENR 7 Regional Executive Director Dr. Isabelo R. Montejo nitug-an nga ang naasoy nga pakisusi sa giumol nga team nagsugod niadto pang adlaw nga Martes.

Matud pa ni Montejo nga iyang gipaabot nga mahuman ang maong imbestigasyon sa Hunyo 9 ning tuiga ug makuha ang "full finding and recommendations" gikan sa naasoy nga team nga maoy basehan kun angayan bang pasakaan og kaso ang nagtukod sa naasoy nga illegal structures daplin sa dagat.

Ang nine-member team gipangulohan ni Protected Area and Wildlife Division chief Ariel Rica ug ang mga membro niini gilangkuban nila ni Community Environment and Natural Resources Officer sa Carmen, Cebu and Bantayan Island Wilderness Area (BIWA) Protected Area Superintendent Roldan Cotejo; Atty. Unalee Monares, foresters Laurentino Bautista, Jimmy Panebio, Carlington Catadman, Vicente Rustico Calizar, and Raul Pasoc; ug Lorenz Gideon Esmero. (BANAT NEWS)