Junkfoods, softdrinks gidili sa kanten sa mga tunghaan

CEBU, Philippines - Subling gipahinumduman sa Department of Education ang mga tunghaan kalabot sa ibaligya nga pagkaon sa mga school canteens. Ubos sa lagda sa DepEd, gidili ang pagbaligya og mga junk foods ug mga ilimnon sama sa carbonated ug softdrinks.

Matud ni Education Assistant Secretary Tonisito Umali, regular ang gihimong monitoring sa DepEd ilabi na sa mga pampublikong tunghaan.

Gusto nilang maseguro nga ang mga gibaligyang pagkaon sa mga estudyante ilabi na ang naa sa elementarya, mga sustansyadong pagkaon lamang.

Nakigtambayayong usab ang DepEd sa mga lokal nga kagamhanan ug sa Department of Health (DoH) kalabot sa pagpagawas og business ug sanitary permits sa mga canteens.

Gipahinumduman usab sa DepEd ang mga ginikanan nga angay tagaan og importansya ang kahimsog sa ilang mga anak ug pabawnan lamang kini og mga sustansyadong pagkaon. (BANAT NEWS)