Atty. Quiñanola: Buhi pa ko
CEBU, Philippines - Gikataw-an sa usa ka banggiitang abogado ug kanhi heneral sa kapolisan ang nikatap nga taho nga siya namatay sa niaging gabii.
Si Atty. Fritz Quiñanola miingon ang hungihong sama sa iyang kamatayon dili na bag-o alang kaniya.
Gani matud niya nga niadtong sakop pa siya sa Philippine Constabulary gidungog na siya nga namatay makaduha ka higayon.
Dugang ni Quiñanola nga daghan ang mitawag kaniya kagahapon sa buntag tungod sa maong taho.
Matud niya nga dako pa siyang buhi ug dili angay tuohan ang maong taho.
Si Quiñanola kanhi direktor sa Police Regional Office-7 ug usa ka kanhi heneral sa Philippine National Police.
Siya ang private lawyer sa pamilyang Bacolod sa kasong pagpatay kang Alona kinsa ang bana nga si kanhi kongresista ug Philippine Benevolent Missionaries Association Divine Master Ruben Ecleo Jr. ang nakombikto sa kasong parricide.
Si Quiñanola usa ka law professor sa Gullas Law School sa University of the Visayas ug mamahayag sa CCTN Channel 47. (BANAT NEWS)
- Latest
