LGU nangayo og pundo alang sa drug testing
CEBU, Philippines - Gihangyo karon sa mga Local Government Units si Gobernador Hilario Davide III nga gahinan og pundo bisan karon lang tuiga ang pagpahigayon og drug test sa mga empleyado sa ilang mga lungsod.
Kini subay sa panawagan sa gobernador nga kinahanglang drug free gyud ang mga kawani sa kalungsuran sa tibuok probinsiya sa Sugbo.
Si Naga City Mayor Valdemar Chiong mibisita kagahapon kang Davide uban sa iyang mga konsehal ug kapitan miingon nga pundo ra gyud alang sa pagpahigayon kanunay og drug test ang ilang kuwang.
Dili pa lang dugay, dunay drug test nga gihimo ang Naga ug duha ka kawani niini ang nagpositibo ug gisuspenso na karon.
Si Alfredo Herrera, executive director sa Cebu Provincial Anti-Drugs Abuse Commission kon CPADAC miingon nga wala pa nila nahisgutan ang kabahin sa kung kinsay mogasto sa drug testing sa kalungsoran.
Ang CPADAC gigahinan og P5 milyones karong tuiga apan alang ra gyud kini sa mga Capitol employees.
Sa pagkakaron ang mga mayor sa Naga, Moalboal ug Daanbantayan pa ang nisanong sa awhag sa gobernador. Si Davide nagkanayon nga andam siyang mohatag og pundo kung mangayo ang mga LGU para sa ilang ipahigayon nga drug test. (BANAT NEWS)
- Latest
