Peke nga kwarta gigamit pagpalit og itlog

CEBU, Philippines - Duha ka lalaking misulay pagpayuhot og peke nga kwarta ang nasikop human misulay og palusot og pekeng P500 apan nasakpan. Nasikop sa Theft and Robbery Section sa CCPO ang duha ka mga suspetsado nga misulay unta og palusot sa peke nga P500 sa merkado sa T. Padilla, alas-9 sa buntag, Mayo 5.

Si Michael Banggoy, 19, tindero sa merkado sa maong lugar nakabantay nga peke ang kwarta nga gibayad sa duha nga sila si Morel Relente, 33, ug Joel Bijante, 42, pulos nagpuyo sa maong lugar.

Matud pa nga gusto unta nga mopalit og usa ka tray sa itlog si Relente nga gisugo sa iyang kauban nga si Bijante. Apan pagkabantay ni Banggoy nga peke ang kwarta dali niyang gipahibalo ang agalon kinsa mitawag dayon sa TRS. (BANAT NEWS)