LTO ug PNP naglaum wala’y aksidente atol semana santa

CEBU, Philippines - Ang Land Transportation Office (LTO) ug ang kapolisan nagpahigayon og roadside inspection sa tinguha nga wala’y mahitabong aksidente sa kadalanan atol sa Semana Santa.

Si Joel Maloloy-on, pangulo sa LTO operation’s division, mipahibalo nga may gipagawas na sila nga memorandum sa tanang LTO offices sa pagpakatap sa ilang mga sakop aron mopahigayon og operasyon sugod karong adlawa hangtud na sa Abril 21.

Ang LTO miawhag sa mga operator nga siguraduhon nga dili hago ang ilang mga drayber, dili tiggamitan og ginadiling drugas ug dili usab palahubog aron malikayan ang disgrasya.

Ipakatap sa LTO-7   sa nagkadaiyang terminal ang ilang mga enforcers sa pagsiguro nga walay overloading sa pagpasakay og pasahero tungod kay tumong nila ang zero accident atol sa pagsaulog sa Semana Santa.

Samtang ang kadagkoan sa LTFRB-7 mipahibawo nga may mga special permit na silang giluwatan alang sa mga public transport nga mobiyahe gawas sa ilang prangkisa. Gibalibaran hinoon sa LTFRB-7 ang gipangayo nga special permit sa Valla Car Transit tungod sa kakulian sa ilang mga dokumento.

Karong Abril 15 liboton sa LTFRB ang mga terminal aron susihon ang mga public transport kung kompleto ba sila sa dokumento pagsiguro nga walay kolorum nga makabiyahe. (BANAT NEWS)