Ginang gipatay sa kaipon

CEBU, Philippines — Patay ang usa ka 57-anyos nga babaye himan kini gitigbas sa iyang 69-anyos nga kapuyo nga didto sa lungsod sa Tuburan tungod sa giingong pangabubho.

Ang namatay mao ang kaipon sa suspek nga si Leonila Cerado Maguate, 57, human natigbasan sa liog abut sa nawong  ug sa iyang bukton, samtang talandugon ang kahimtang sa ilang anak nga si Felix Maguate Rebanuel Jr., 33, nakaangkon og samad-tinigbasan sa nagkadaiyang parte nga lawas, kamut ug mga bukton, ang duha pulos residente sa naasoy nga dapit.

Samtang ang suspect nga si Felix Marquez Rebanuel Sr., 69 anyos, nadakpan apan anaa karon sa Tuburan District Hospital human nagdunggab sa iyang kaugalingon.

Sa pagabot sa kapulisan ilang naabtan ang mga biktima nga nagkadugo ug dunay daghang samad tinigbasan diha sa sud sa ilang balay.

Sa imbestigasyon sa Tuburan Police Station ang 57-anyos nga biktima natulog sa kwarto niini dihang giguba sa suspek ang lock gamit ang sundang ug gitigbas kini sa suspek sa liog ug bukton.

Nakamata  gikan sa pagkatulog ang 33-anyos nga anak sa duha ug gisuwayan niini pagpugong ang suspek ug nakigilogay sa sundang apan giapil siya niini og tigbas sa nagkadaiyang parte sa lawas, mga bukton ug sa palad niini niini.

Nasayran nga tulo ang anak sa duha. Ang 33-anyos talandugon ang kahimtang karon sa tambalanan tungod sa mga samad gikan sa 18 ka pulgada nga sundang.

Nagkanayon si Police Lieutenant Colonel Glenn Hife, hepe sa Tuburan Police Station nga nangabubho ang suspek sa iyang asawa kay dunay mga batan-ong mag-anhaan sa balay niini.

Apan base sa nakuhang impormasyon ni Hife, mga barkada kadto sa ilang mga anak.

Sigon pa ni Hife usa ka tuig na nga buwag og gipuy-an ang duha kay magsige ang pangabubho ang lalaki apan pirmeng mag-anhaan sa balay sa biktima ang suspect kay maniid nga iyahang asawa. Gani  gipatawag na sila sa barangay tungod sa away ug selos.

Giklaro hinoon ni Hife nga dili hubog ug wala sab naka droga ang suspek dihang gihimo niini ang krimen.

Duha ka hinagiban ang gigamit sa suspek, ang 18 pulgadas nga sundang ug ang kutsilyo nga mao unta iyang gigamit sa pagdunggab sa iyang kaugalingon, apan gikataho nga wala kini makaagwanta sa kasakit maong nihunong nalang siya ug gipaabot ang mga polis nga modakop kaniya.

Giandam na ang kasong murder ug frustrated homicide ang ipasaka batok sa suspetsado. — Rowena Capistrano (BANAT NEWS)