Suporta vs cyber pornography gipalanog didto sa Kongreso

CEBU, Philippines - Mga gagmay nga bagtingan nga simbolo sa kampanya batok “cyber prostitution” gipangapud-apod ni Lapu-Lapu Lone District Kong. Aileen Radaza sa iyang mga kaubang magbabalaod kagahapon sa labing una niyang “privilege speech” sa hawanan sa Ubos Balay balauranan. Si Radaza mibasa sa iyang privilege speech nga giulohan og "Cyber Prostitution time to ring the alarm bell."

Matud pa ni Radaza nagkataas ang kaso sa cyber prostitution nga nagtakoban nga internet cafe ug call centers nga ang tinud-anay diay nag-exploit sa kahuyang sa kababayen-an.

Base sa pakisusi sa dakbayan sa Lapu-Lapu ug sa mga silingang dapit sa probinsiya sa Sugbu gihimong rason sa mga nadakpang suspek ang kawad-on.

Gani duna pay mga nadakpang ginikanan nga migamit sa ilang mga anak sa maong illegal nga pangita. Giawhag ni Radaza ang iyang mga kaubanang kongresista sa pagpanday og balaodnon nga hatagan og bug-at nga silot ang mga negosyante og internet café ug call centers nga malambigit sa cyber prostitution.

Si Radaza mihangyo sa mga kongresista diha sa hawanan sa Kongreso sa pagbagting sa mga gagmay’ng bagtingan nga iyang gipangapud-apod isip suporta sa iyang lakang sa pagsumpo sa cyber prostitution.

Ang pagpalanog sa gagmay’ng bagtingan sa hawanan sa Kongreso gidunganan usab sa mga kababayen-an nga mitambong sa kalihokan kagahapon alang sa Women’s Month pinangulohan ni Mayor Paz Radaza diha sa Hoopsdome Sports and Cultural Complex. (/EIM)(BANAT NEWS)