Mandaue mag-house-to-house pagpamakuna sa iro

CEBU, Philippines - Hingusgan sa siyudad sa Mandaue ang kampanya kontra rabies ug molusad libreng pagpamakuna og anti-rabies vaccine ang veterinary office alang sa mga iro ug iring sa kabarangayan.

Si Edwin Jumao-as, anti rabies coordinator sa veterinary office sa maong dakbayan miingon nga mag- house-to-house og pagpamakuna sa tinguha nga mahimo silang rabies-free sa mosunod nga katuigan.

Giangkon ni Jumao-as nga wala pa nila kini makab-ot tungod kay dunay tulo ka mga kaso nga natala sa rabies infection gikan sa barangay Tabok, Looc ug Casuntingan.

Matud niya nga madeklarar lang nga rabies-free ang usa ka lugar kun sa sulod sa lima ka tuig way bisan usa ka kaso nga natalang nasakit og rabies. 

Ang dakbayan nakabakuna og 12,000 ka mga iro sa tuig 2013 apan 10,000  ra niini ang nabakunahan sa veterinary office ug ang 2,000 sa mga pribadong veterinary clinics.  Sugdan sa sunod bulan ang house-to-house anti rabies vaccination sa 27 ka barangay sa dakbayan inabagan sa mga Non Governmental Organization.

Si Dr. Hilario Domabos nga sakop sa kahugpongan sa mga pribadong veterinarians miingon nga tudloan usab nila ang mga pet owners sa saktong pag-atiman sa ilang mga iro ug iring. (BANAT NEWS)