Gipabakwit sa Balamban diLi pa pabalikon

CEBU, Philippines - Giawhag sa Department of Environment and Natural Resources kon DENR-7 ang kadagkuan sa lungsod sa Balamban nga dili na pabalikon sa ilang panimalay ang kapin 200 ka mga molupyo sa barangay Gaas sa lungsod sa Balamban tungod sa hulga sa pagdahili sa yuta kay nihumok na pag-ayo ang yuta tungod sa pagpunay og ulan sulod sa pipila ka adlaw.

Sumala pa ni DENR-7 Executive Director Isabelo Montejo nga mas maayo nga ibalhin na lamang sa laing lugar ang nibakwit nga dul-an sa 60 ka mga pamilya nga anaa na karon sa evacuation centers sa maong lungsod.

Gipahibawo niini nga ang barangay Gaas nalakip sa 11 ka mga barangay sa Balamban nga giisyohan sa Mines and Geosciences Bureau   kon MGB-7 og geohazard threat advisory tungod sa peligro nga modahili ang yuta.

 Samtang ang ubang mga barangay sa maong lungsod   nga kuyaw sa landslides mao ang barangay Gingatunan, Lamisa, Luca, Ginatilan, Kabasyangan, Matun-og, Cansumuroy, Magsaysay, Kabagdalan ug   Anduwangan.

Sa syudad sa Sugbo, ang mga barangay nga dunay geohazard threat advisory  mao ang barangay Lusaran, Taptap, Tagbao, Tabunan, Binaliw, Guba, Budlaan, Malubog, Buot taop, Busay, Siraw, Pung-ol Sibugay, Sudlon 1, Sudlon 2, Sinsin, Buhisan, Pamutan, Sapangdako ug Adlawon.

Ang maong mga barangay dunay mga nakitang mga liki sa kabukiran ug dako kaayo ang purohan nga mahugno kini tungod niining padayong pag-ulan.

Gialerto na sa DENR  ug sa Department of Interior and Local Government ang local LGUs aron mohimo og dugang pagpangandam. (BANAT NEWS)