Amnestiya sa armas ipatuman sa PNP

CEBU, Philippines - Andam  nga  mohatag  ang  kagamhanan og unom ka buwan  nga gun amnesty aron sa pag-aghat sa mga nanag-iya og pusil sa tibuok nasud nga ipa-rehistro ang ilang mga pusil.

Base kini sa pagsunod sa gipahugtang balaod sa pagpanag-iya og pusil ubos sa Republic Act 10591 o ang bag-ong Gun Control Law sa nasud.

Ubos niining balaod, may unom ka buwang amnestiya alang sa mga nanag-iya og pusil nga napakyas o wala magpa-lisensya niini sa panahong ipatuman ang implementing rules and regulations (IRR) niini.

Gipahinumdoman sa Philippine National Police (PNP) ang mga sibilyan sa bug-at nga silot sa mga nanag-iya og ilegal nga pusil diin kun kaniadto 4 hangtud 6 ka tuig lamang nga pagkabilanggo ang silot sa mga masakpang nagkupot og mga low firearms o Class A firearms nga walay dokumento, gisaka na kini karon ngadto sa 10 hangtud 12 ka tuig wala pay  labot  sa multa.

Samtang adunay silot nga 6 hangtud 8 ka tuig sa mga gun owner nga masakpang  magdala og armas sa gawas sa balay nga wala’y ‘permit to carry firearm outside residence’ nga kaniadto 6 ka buwan hangtud 6 ka tuig nga pagkabilanggo lamang ang silot.

Sa talaan sa PNP, anaa sa 600,000 ka pusil ang maisip nga dili lisensyado, samtang 25,000 usab ang giingong naa sa kamot sa mga sindikato ug kriminal. (/WC)(BANAT NEWS)