Mga traysikad, traysikol ug tartaniLla gidili gyud sa CSCR
CEBU, Philippines - Mga barangay sa dakbayan sa Talisay nga dunay mga sitio nga naagian sa Cebu South Coastal Road gipahimangnoan sa kagamhanan sa siyudad sa pag-implementar sa ordinansa sa pagdili sa mga slow moving vehicles sa nahisgutang karsada aron malikayan ang disgrasya.
Si Talisay City legal officer, Alfredo Sipalay sa iyang suwat mipahinumdum sa barangay San Roque, Cansojong ug San Isidro sa City Ordinance 2004-04 nga nagdili sa mga tricycle, bisekleta ug mga tartanilya nga moagi diha sa CSCR.
Mabantayan nga diha sa nahisgutang karsada dunay mga traysikad nga mag-agi agi ug gani kahinumduman sa milabay’ng tuig usa ka drayber sa traysikad ang namatay dihang nadasmagan og awto samtang naguroy sa iyang traysikad diha sa mga CSCR habig sa barangay San Roque.
Matud ni Sipalay nga kung dunay madisgrasya diha sa CSCR nga maglambigit sa traysikad, ang mayor unya ang basolon niini tungod kay pasanginlang wala makabadlong.
Ang city legal officer nagkanayon kini nga nalipay silang ang mga opisyal sa nahisgutang mga barangay misaad kining motabang sa pagdakop sa mga traysikad nga molatas diha sa CSCR diin uban niini mosugat pa sa dagan sa trapiko.
Si Mayor Johnny De los Reyes nagkanayon usab nga niining ulahi lang, naobserbahan niya ang nagkahuot nga dagan sa trapiko diha sa CSCR tungod kay ang mga nahisgutang gidili nga mga slow moving vehicles motadlas man usab sa maong national highway. Matud sa mayor nga ang mga slow moving vehicles makabalda kini sa dagan sa trapiko. (BANAT NEWS)
- Latest
