Duha ka batang bungi dad-on sa Israel aron operahan

CEBU, Philippines - Duha ka mga bata sa Bogo City nga may cleft palate o bungi  dad-on sa nasud nga Israel karong adlawa kuyog sa mga Israel Defense Forces nga manguli na sa ilang nasud.

Ang duha ka mga bata, matud pa sa Embassy of Israel in the Philippines operahan didto nga libre. Kuyogan sila sa ilang mga legal guardians ug ang Israeli Ministry of Foreign Affairs ang mo -host kanila didto sa maong nasud.

Ang IMFA ug ang Schneider Children's Hospital, mao usab ang mogasto tanan sa ilang paglarga ug pagbalik nila nganhi sa Pilipinas.

Gibanabanang maabtan og duha ka semana didto ang mga bata human sa operasyon ug sa pag-alim sa maong operasyon.

Ang 150 ka mga Israeli sa IDF niabot sa Bogo City niadtong Nobiyembre 15 diin nagtukod sila og usa ka hospital tent aron sa pagtambal sa mga biktima sa bagyo sa amihanang Sugbo.

Ang IDF nakapanambal og sobra 2,500 ka mga pasyente, ingon man nihimo usab sila og mga major surgeries ug pagpanganak.

Ang mga Israelis nidonar usab og mga tambal nga nagkantidad og $500,000 o P20 milyones alang sa mga district hospital sa tibuok Cebu ingon man ang uban pa nilang mga gamit ngadto sa Cebu Provincial Government. (BANAT NEWS)