Lalawigan mosaulog sa National Children’s Month

CEBU, Philippines - Gisaulog isip National Children’s  Month (NCM) ang    buwan sa  Oktubre  nga  karon anaa  na  sa iyang  ika-21 ka tuig  nga  gihandom  sa tibuok  nasud.

Si Roger Serna, opisyal  sa Provincial  Council for the Welfare of Children (PCWC)  sa lalawigan  sa Sugbo mibutyag  nga   giproklamar  ang  Oktubre  nga  NCM pinaagi  sa Presidential  Proclamation 267  niadtong 1993.

Gumikan  niini  isip  salmot  sa  maong kalihokan matag  tuig,  ang  kagamhanan sa lalawigan milusad  og  programa  sa pag-ugkat  sa talent  sa kabataang   Sugbuanon  matag  buwan  Oktubre, matag  tuig.

Pinaagi sa PCWC,  ang  kagamhanan  migahin og  P500,000  alang  sa tinuig  nga  paglusad  sa  bangga  sa pag-awit  sa  mga  Sinugbuanong  awit, sumala  ni Serna.

Sa tulumanon Kapihan  sa PIA  nga  gipalanog  sa DYMR kagahapon,  si Serna  miingon  nga  karong  umaabot  nga  Oktubre 30, ipahigayon ang  Halad  sa Kabataan  pinaagi  sa   Cebuano Song  Competition  didto  sa   Cebu  Cultural  Center sa Gorordo Avenue,  ning  dakbayan  sa Sugbo.

Matud ni  Serna  nga una  nila  kini  ilusad,  mipahigayon una  sila  og  seminar  sa pagtudlo  sa mga  kabataan  sa paggama  og  awit nga  Sinugbuanon.

Gikan s a iyang  tuno  ngadto  sa pagtagik  na  sa  teksto,  nga  maoy  ilang  awiton  sa  panahon  na  sa  bangga, gitudlo  kini  ngadto  sa  mga  contestant, sumala  ni  Serna.

Busa  miingon  si  Serna  nga  sa  maong  kasaulogan  masud-ong  ang  kaalegre  sa kabataan  nga  gikan sa nagkalain-laing  lungsod  sa lalawigan.

Maglakip  kini    sa song writing  contest, song  competition,  vocal duet, guitar  duet, ug rondalla  competition.

Miingon  si  Serna  nga  sila mismo  ang  muadto  sa  kalungsoran  aron  pilian  kadtong  mga  may talentong  kabataan  nga angay  isalmot  sa provincial  competition  sa  Oktubre 30.

Kini  ilang  gihimo  pinaagi  sa  pag-cluster  kon  pagbahig  sa  mga  lungsod  ngadto  sa tagsa-tagsa  ka  grupo,  ug  himoon  nila  sa usa ka  lungsod  nga  ilang mapilian  ang   lokal  nga sangka  sa  mga contestant  nga  gikan  sa tagsa-tagsa  ka  lungsod.

Midugang  si Serna  nga  ang  mananaug  sa  song  competition gantihan  nila  og  P6,000  plus  trophy  sa unang  ganti, P4,000  plus trophy  sa  ikaduha, ug P3,000 plus trophy alang  sa ikatulo,  samtang  makadawat  og tag P2,000  ang  matag  usa  nga  misalmot  isip  consolation  prizes.

Samtang  sa Rondalla  competition  miingon  si Serna  nga P20,000  plus  trophy  ang unang  ganti, P16,000  plus  trophy  ang  ikaduha, ug P10,000  plus trophy  ang  ikatulo,  ug tag P7,000  ang  consolation  prizes. (BANAT NEWS)