Mga opisyal giawhag paggama og dam

CEBU, Philippines -  Si Regional Director Dr. Isabelo Montejo  sa Department of Environment and Natural Resources sa rehiyon 7 (DENR-7)  misugyot sa   mga Local Chief Executives (LCE) sa paggama  og sawranan sa tubig nga gikan sa ilaya o uplands sulod sa ilang Area of Responsibility (AOR). Kini usa sa  napanglantawan nga pamaagi ni Montejo isip sulbad  nga  dili mamugna  ang  baha.

Matud pa niya nga ang  pagmugna  og gagmay nga  mga dam nga  maoy  mosawod sa tubig  sa uwan  usa  sa  bahin sa physical development plan nga  gisugyot sa Cabinet cluster on climate change. Kini tungod  kay  matud pa ni Montejo dili lamang  mogiya sa lapad  nga  buhagay  sa tubig  sa uwan apan usa  kini  sa makasanta  sa kainit  sa global warning.  Dugang pa ni Montejo nga nagkaanam na og kaupaw ang kabungtoran tungod sa pagpataka sa mga tawo og pamutol sa mga  kahoy.

Gumikan  niini ang tubig nga gikan sa kabungtoran dali ra gayud kaayong modagayday sa ubos nga bahin nga  moresulta  sa  pagbaha sa kasapaan, dugang pa ni Montejo.

Gipasabot ni Montejo nga ang mga punoan sa kahoy naghatag og ulahing solusyon sa pag-usab-usab sa kahimtang sa klima sa panahon sanglit ang mga kahoy dili lamang carbon ang gitipigan niini sa ilang mga sanga kundi naghatag usab kini og oxygen gikan sa ilang mga dahon nga maoy musustener sa kinabuhi sa katawhan nga nagpuyo sa kalibutan pinaagi sa proseso sa photosynthesis. (BANAT NEWS)