Duha gidakop tungod sa pagdala og pinabuthang isda
CEBU, Philippines — Gidakop ang duha ka lalaki human nasikop sa mga otoridad ang usa ka sakyanan nga nagkarga og mga isdang gidudahang binuthan og dinamita sa Barangay Mainit, Oslob, Cebu niadtong Nobyembre 12, 2026.
Ang Cebu Maritime Police Station, ubos sa pagpangulo sa hepe niini nga si Police Major Randy P. Veran, nagpahigayon og Market Denial Operation diin ilang gisita ang sakyanan nga nagkarga og daghang kahon nga styrofoam nga adunay nagkalain-laing klase sa isda.
Gikan sa Zamboanga City ang maong sakyanan ug padulong unta sa Pasil Fish Port sa Cebu City sa dihang kini nasikop. Matud sa Philippine National Police (PNP), gidakop ang duha ka lalaki tungod sa giingong paglapas sa Section 126 sa Republic Act 10654, nga nagdili sa pagpanag-iya, pagbaligya o paglabay sa mga isdang ilegal nga nadakpan.
Sa pagsusi sa fish examiner gikan sa Bureau of Fisheries and Aquatic Resources (BFAR), nakaplagan nga ang nagkalain-laing klase sa isda adunay mga timailhan nga nadakpan kini pinaagi sa blast fishing o paggamit og mga eksplosibo.
Gipasidan-an sa mga otoridad ang publiko batok sa posibleng peligro sa panglawas nga mahimong ipahinabo sa pagkaon sa mga isdang nadakpan pinaagi sa ilegal nga pamaagi sa pagpangisda, lakip na ang pagkahilo sa pagkaon ug pagkahilo tungod sa makadaot nga mga kemikal o toksin.
Human sa pagsusi sa BFAR, gitino sa mga otoridad nga ang mga isda nalambigit sa paglapas sa mga balaod ug regulasyon sa pangisda.
Ang duha ka gidakop, lakip ang sakyanan ug mga nakumpiskang isda, gidala sa Alegria Municipal Maritime Team (MMT) alang sa hustong dokumentasyon ug dugang nga pagproseso. — /IBM (BANAT NEWS)
- Latest















