Bus vs Multicab, 1 patay, tulo samdan

CEBU, Philippines — Maayong pagkatuhog sa dos-por-dos nga kahoy ang lawas sa usa ka pasahero nga nakabsan sa kinabuhi ug tulo sab ka laking pasahero ang naangol human nagkabanggaanay ang usa ka pampasaherong bus ug usa ka multicab pick-up sa National Highway sa utlanan sa Barangay Anislag, lungsod sa Pinamungajan, Cebu, alas 11:55 sa buntag, Domingo, Nobiyembre 15, 2026.
Giingong giangkon mismo sa drayber sa multicab nga nakatulog siya kadiyot samtang nagmaneho, hinungdan nga nasulod siya pikas lane ang iyang sakyanan ug nabanggaan og direkta ang nagkasugat nga pampasaherong bus.
Ang bus gipanagiya sa Metro Cebu Auto Bus Corporation nga dunay body number 801. Walay gihatag nga mga pangalan sa mga drayber sa bus ug multicab ang kapolisan, lakip sab ang pangalan sa nakalas ug mga naangol atol ning pagsulat sa balita.
Base sa inisyal nga imbestigasyon, padulong sa lungsod sa Pinamungajan ang multicab samtang paingon sa San Fernando ug dakbayan sa Sugbo ang bus sa dihang nahitabo ang bangga.
Tungod sa kusog sa impact, nawad-an og kontrol ang drayber sa bus ug misirit kini paingon sa usa ka balay nga gipanag-iya sa usa ka alyas Jully.
Basi sa kuha sa video nga nag-viral sa social media ng gi-post ni Clefferd Bajao,, makita nga naharos sa bus ang kural sa maong panimalay apil ang mga atop sa sa kilid.
Makita sab ang dunay mga kahoy nga napasok sa tuong glass windshield sa bus nga gikatahong maoy nakatuhog sa usa sa mga pasahero. Patay na kini pag-abot sa tambalanan.
Samtang ang multicab nga color gray, maayong pagkagusbat sa atubangang bahin niini ug nawalis gyud ang atop niini ug nalabay ngadto sa kilid sa karsada.
Samtang, anaa na karon sa Pinamungajan Police Station ang duha ka drayber nga nalambigit sa aksidente ug gipailalom sa imbestigasyon sa kapulisan. — /IBM (BANAT NEWS)
- Latest















