Drug test salaan unta sa mga badlungon apan naabusahan

CEBU, Philippines - Ang  hingpit nga pagwagtang sa rekisito nga pagpa-drug test alang sa pagkuha og lisensiya sa pagmaneho og sakyanan sa Land Transportation Office (LTO) maoy usa sa mga pamaagi sa pagputol sa anomaliya.

Si Dr. Danilo Dionson nga nanag-iya usab og drug testing center sa dakbayan sa Mandaue mibutyag sa Banat Manobela  nga ang drug testing sa mokuha og drivers license maayo unta ang katuyoan.

Apan wala makab-ot ang maayong tumong niini tungod kay duna gihapoy mga nagpalusot niini.

Si Nick Villahermosa nga kanhi presidente sa Cebu Provincial Bus Operator Association (CPBOA) nga nahinabi sa Banat Monbela miingon nga bisan kun dugang kining galastohan sa mga drayber ang pagpa-drug test  mas maayo kini kay masiguro man kun kinsa ang katugotan sa paghupot og lisensiya sa LTO.

Dugang pa ni Villahermosa  nga isip bus operator  kinahanglan nilang masiguro nga ang drayber nga ilang ma-hire dili drug user.

Nagpasalamat hinuon siya nga dunay random roadside drug testing matag karon ug unya ang Land Transportation Office  tungod kay makapa-disiplina kini sa mga drivers nga tiggamitan og illegal drugs. (BANAT NEWS)