Usa sa mi-rape ug mipatay sa tomboy nadakpan

CEBU, Philippines - Usa sa mga giingong milugos ug mipatay sa usa ka tomboy sa Barangay Mabolo ning dakbayan sa Sugbu sa miaging semana nadakpan na sa kapulisan niaging Huwebes sa hapon duol sa nahitabuan.

Ang suspek mao si Ruel Jusay, 39, usa ka basurero ug nagpuyo sa maong barangay.

Matud pa sa hepe sa Mabolo Police Station nga si Chief Insp. Ryan Devaras, usa ka lalaking saksi ang mitumbok kang Jusay nga maoy iyang nakit-ang nagsunodsunod sa biktimang si Quennie Marie Arriesgado, 19, niadtong Hulyo 20 sa gabii, pagkakaadlawon (Hulyo 21) napalgang patay ang biktima diha sa kalibonan duol sa taytayan.

Ang suspek kalit usab nga nawala diha sa maong lugar sud sa pipila ka  mga adlaw human sa hitabo.

Gipangita pa karon ang duha pa ka laing rapist-killers kansang mga ngalan gipugngan pa sa kapolisan.

Ang suspek, kusganong mihimakak nga apil siya sa milugos ug mipatay sa biktima apan iyang giangkon nga nakaila siya sa laing duha ka mga gidudahan.

“Premiro niingon siya nga wala siya didto pagkahitabo, then niingon na sad nga natug daw siya didto sa iyang balay,” matud pang Devaras.

Si Arriesgado, usa ka 3rd year high school student sa Zapatera National High School nga namaligya og newspaper  ug nagbantay sa usa ka-barbeque-han para makasuporta sa iyang pag-eskwela.

Base sa resulta sa otopsiya, ang biktima namatay pinaagi sa pagtuok  ug nasuta usab nga gilugos gyud kini. (/EIM) (BANAT NEWS)