Fastfood chain gikiha kay kustomer nakatulon og bildo

CEBU, Philippines - Usa ka public attorney ang mipasaka og kasong sibil batok sa presidente sa usa ka kompanya nga maoy nag-operate sa usa ka fastfood chain aron pabayron kini og danyos ug attorneys fees.

Ang mipasaka og kaso mao si Atty. Maria Lourdes Bragat tungod sa gidudahang nakatulon siya og bildo gikan sa nainom niyang iced tea sa maong kan-anan niadtong Enero 6, 2013.

Sumala pa ni Bragat, nanihapon sila sa iya kaniadtong fiancée ug karon nabana na niyang si Police Senior Inspector Albert Quilitorio sa maong fastfood chain (gipugngan una sa Banat News samtang nagpaabot pa sa ilang tubag) sud sa usa ka mall sa North Reclamation Area, Cebu City, iyang nabantayan nga naay buak nga bildo sa sud sa iyang giimnan nga iced tea.

Tungod niini ang gikonsiderar nilang duha nga ang ila untang romantic dinner nahimong katalagman, hinungdan nga ilang gipatawag ang manager nga si Hermie Dumaguit ug iyang gipakita nga duna gyuy buak nga bildo sud sa iyang giimnan nga iced tea.

Tungod kay nag-panic na siya, iyang gitawagan iyang higalang surgeon nga si Dr. Ferdinand Kionisala ug nangunsulta kun unsa iyang posibling himoon kun nakatulon siya og mga bildo.

Giingong gitambagan siya niini nga magpasusi sa hospital aron ma-monitor ang maong mga bildo tungod kay posibleng makasamad kini sa iyang internal organs.

Matud ni Bragat nga ang ebidensya (bildo sa iced tea) gikuhaan og picture  ug gibutang sa usa ka transparent plastic bag sa security personnel sa maong mall samtang siya nagpa-confine dayon sa tambalanan.

Ug base sa endoscopy examination nakit-an nga naay “inflammation” ang iyang esophagus. Ang bayrunon giabaga sa gireklamong kompanya.

Apan human siya makagawas girekomendar sa mga doktor nga kinahanglang magpa-checkup siya kanunay apan giingong napakyas ang maong opisyal sa kompanya pag-reimburse sa iyang expenses.

Ug tungod sa maong problema naapektahan hasta ang iyang pagka public attorney ug husto lamang nga mangayo siya og bayad sa danyos.

Matud pa nga gipadad-an na niya og demand letter ang maong opisyal apan giingong gihagit hinuon siya niini nga ipasaka na lang ang kaso sa korte.

Nangayo si Ma. Lourdes   og damages nga P1 million para moral damages, P1 million para exemplary damages ug P50,000 para attorney’s fees.( /EIM) (BANAT NEWS)