Kasong pangawkaw nga milanat na’g 13 anyos gibasura
CEBU, Philippines - Ang kaso nga pagpangawkaw nga gipasaka batok sa upat ka kawani sa Market Operations Division sa dakbayan sa Sugbo gibasura sa hukmanan kay bisan sa paglabay sa 13 ka tuig ang prosecution wala makamatuod nga sila sad-an.
Si Judge Gil Acosta sa Municipal Trial Court in Cities (MTCC) sa dakbayan sa Sugbo miingon nga kun ipadayon niya ang paghusay sa kaso mahimong makalapas siya sa lagda nga gilatid sa Speedy Trial Act.
Ang upat ka akusado sa kaso mao sila si Market Supervisor Salvador Doctor, Rosellen Namoc, Teresita Jaca ug si Susan Guerra.
Ang rekord nagpakita nga ang kaso gipasaka batok sa upat ka kawani sa dakbayan kaniadto pa’ng 2000, ug ang una nila nga saksi gipresentar sa hukmanan usa ka tuig ang milabay.
Ang ikaduha nga saksi batok sa mga akusado gipresentar Septembre 11, 2003 samtang ang ikatulo nga saksi gipaatubang sa hukmanan niadtong Oktobre 9, 2007.
Ang mga abogado sa upat ka sinumbong miawhag sa korte nga i-dismiss na ang kaso kay hilabihan na ang kalangay sa paghusay. Wala hinoon mabilanggo ang upat ka akusado.
Basi sa balaud nga ang paghusay sa kaso kinahanglang dili unta molapas sa unom ka buwan.
Si Doctor miawhag ni Mayor Michael Rama nga ihatag kanila ang ilang sweldo atul sa unom ka buwan nga sila gisuspenso sa ilang trabaho dihang nagpadayon pa ang husay. (BANAT NEWS)
- Latest
