Alayon members agnihon nga mag-LP

CEBU, Philippines - Paninguhaon sa Liberal Party nga agnihon ang mga kaalyado sa Alayon Party diha sa konseho sa dakbayan sa Talisay aron magpasakop kanila.

Ang bag-ong napiling Bise Mayor sa dakbayan sa Talisay nga si Romeo Villarante mibutyag nga suwayan nila og imbitar ang mayoriya nga gilangkuban sa mga sakop sa Alayon Party.

Si Mayor-elect Johnny Delos Reyes ug Villarante nga ubos sa LP ang mipildi ni Kongresista Eduardo Gullas ug ni Bise Mayor Alan Bucao nga parehong ubos sa Alayon sa milabay’ng eleksiyon.

Si Villarante mibutyag nga gihinay-hinay na nila og kombinsir si Konsehal Edward Alesna, Dennis Basillote ug Mayor Socrates Fernandez nga moalyado sa LP. Si Alesna ug Basillote ang ubos na karon sa kataposang termino.

Lakip sa alyado sa Alayon ang duha ka ex-officio members nga presidente sa Association of Barangay Captains ug presidente sa Sangguniang Kabataan Federation.

Ang kaalyado sa LP karon diha sa konseho tulo lang nga sila si Konsehal Danny Caballero, Val  Ylanan ug Aldin Diaz.

Matud ni Villarante nga kung ang siyam ka mga alyado sa Alayon moalyado kini sa LP hatagan kini og prayoridad sa bag-ong administrasyon sama sa quota sa mga job orders ug uban pa.

Dugang ni Villarante nga magpalabang unya sila og sugyot ngadto sa konseho nga mahatagan og Legislative Assistance Fund ang mga konsehal sama sa dakbayan sa Sugbo ug Naga. (Brenda D. Batuto/EIM) (BANAT BALITA)