Gasolina sa kusina hinungdan sa sunog?

CEBU, Philippines - Gibana-bana  nga  mikabat  sa P200,000  ang  kantidad  sa upat  ka  balay  ug  ubang  mga  kabtangang  gilamoy  sa kayo  mugna  sa gituohang  gasoline  sa abohan    didto   sa Sitio Suba, Brgy. Puente, lungsod  sa  Carmen,  sa miaging hapon.

Ang  mga  nasunogan  mao  sila  Concordio Monteroyo, 48,  Augustin Monteroyo, 65, Danilo Aberilla, hingkod,   pulos minyo, ug molupyo sa maong dapit.

Ang   mga  bombero  sa Carmen Fire  Department   nga gipangunahan  ni  SFO1 Romeo Pono  maoy  miresponde  dayon  ug  mipakgang   sa maong  sunog  hinungdan  nga wala  na  makakatap  ang  kayo  sa  uban  pang  silingang  mga  balay  sa naasoy’ng lugar. Sa pasiunang   imbistigasyon nga gipahigayon  sa mga  bombero ug kapolisan,  nasuta   nga ang kayo nagsugod sa kusina   sa balay  ni Concordio.

Nasayran  sa  mga  imbistigador   nga  nagluto  sa maong higayon  ang  asawa ni Concordio  apan  gibiyaan  ang  kayo  sa abohan    kay  miatiman  sa ilang  apo  sulod  sa lawak  sa ilang  balay  ug nakurat  nalang  sila  kay  kalit  mang  miulbo  ang  kayo.

Sa  imbistigasyon  nga  gihimo  sa  taga  bombero  nasuta  nila  nga ang  gasoline  nga  gisud  og  gallon  maoy  posibling  gidakop  sa kayo  ug  nahimong  hinungdan  sa maong  sunog. Dali  kaayong  naugdaw  ang  maong  mga  balay  tungod  kay  ginama  kini  og  gaan  kaayong  mga  materyales.

Hinuon  walay  kinabuhing  naangin  sa maong  sunog. (BANAT NEWS)