Armadong grupo sa 4th district nanghulga

CEBU, Philippines - Gitug-an ni 4th District Cong. Benhur Salimbangon nga nakadawat siya og report nga may mga armadong mga tawo nga nagsugod na og suroysuroy sa pipila ka mga lugar sa ika-upat nga distrito sulod na sa pipila ka mga semana karon.

Sumala pa ni Salimbangon nga daghan  na  ang nakadiskita sa nahisgutang mga armadong mga tawo sa pipila ka mga bukirang barangay sa syudad sa Bogo ug ang mga kasikbit niining mga lungsod sama sa Tabogon, San Remigio ug Tabuelan.

Si Salimbangon wala hinuon motumbok nga kining maong mga armadong mga tawo mga goons  sa kaatbang sa politika apan iyang gitataw nga nabalaka kaayo siya tungod kay ang girumbo sa maong grupo  mao man ang iyang mga tigpaluyo.

Gani iyang gitataw nga ubay-ubay na sa iyang mga supporter ang mireklamo ug nagpakitabang kaniya tungod kay gisigihan kini og hulga sa maong mga tawo.

Si Salimbangon nagkanayon nga mohangyo siya  sa   kapolisan ug sa militar sa pagsusi sa nahisgutang mga armadong mga tawo aron maundang na ang pagpanghulga niini ngadto sa iyang  mga  suporter

Iya hinuon nga gitumbok nga wala kaayo siya mabalaka sa umaabot nga election tungod kay masaligon siya nga ang katawhan may  dakong kompyansa  ug  pagsalig  kaniya  apan ang iyang gikahadlokan mao ang kahapsay ug kalinaw sa ika-upat nga distrito ilabina sa syudad sa Bogo nga posibling makaguba na hinuon sa piniliay sa bulan sa Mayo.

Subay sa pamahayag ni Salimbangon, si ANAD Partylist Representative Pastor Jun Alcover mipasalig  nga  motabang  siya  pagsusi  niining  mga tawhana. (BANAT NEWS)