Hinay nga signal mao ray problemang nakita sa PCOS machine test kagahapon
CEBU, Philippines - Walay nakitang problema ang gipahigayong field transmission test sa Commission on Elections kagahapon nga gihimo sa Cebu City ug Lapu-Lapu City.
Matud pa ni Comelec 7 Provincial Supervisor Lionel Marco Castillano bugtong problema nga ilang nasinati mao ang kalangay sa pag-transmit tungod sa hinay nga network signal sa diha sa Lapu-lapu City nga gigamit sa Presinct Count Optical Scan (PCOS) machine.
Matud pa ni Castillano bisan pa man niini mapadala gihapon dayon ang resulta ngadto sa kaulohan nga maoy basehan sa eskutenyo.
Sumala pa ni Castillano bisan nakagamit na sila niini nga mga makina sa nakalabay nga eleksyon gusto lang niyang masiguro nga andam na kini sa bulan sa Mayo nga mao ang adlaw sa pagbotar.
Pinaagi sa maong field test maka-adjust pa sila kung unsay mga gikinahanglang solusyon kung dunay makit-ang problema sama na lang sa kahinay sa signal sa network.
Giangkon hinuon ni Castillano nga duna gyu’y mga lugar nga hinay ang signal maong madelatar og diyutay ang transmission sa election ballots.
Apan si Comelec 7 Regional Director Temie Lambino miingon nga aduna pa sila’y gi-andam nga duha ka backup plans kun mokagar gyud ang transmission gikan sa canvassing sa consolidated systems sa mga munisipyo ug siyudad.
Matud pang Lambino usa niini mao ang broadband global area network satellite ug kung mopalyar gihapon kini adunay Compact Flash (CF) cards o ba kaha manual nga dad-on ang consolidated systems sa provincial election board ug didto kini ipasulod una pa ipadala sa national election board. (EIM)(BANAT NEWS)
- Latest
