Mananaug sa Panagtagbo Festival gigantihan

CEBU, Philippines - Ang cluster 4 nga gilangkoban sa barangay Opao, Umapad, ug barangay Alang-Alang maoy giila nga labing maayo nga contingent nga mipakita sa ilang kahanas  ug  kamabulokon  sa  pagsayaw.

Si June Oliver Figueroa nga magtutudlo sa Mandaue City Science High School  miingon nga ang matag paso sa ilang pagsayaw  ilang gikuha gikan sa American folkdance sa Birdenia ug ilang gikumbinar   ang sistema  sa  mga stepping  niini.

Mao  kini  nakadugang  sa pagkamabulokon sa ilang contingent nga nakapahugyaw sa bagang duot  sa katawhan nga misaksi sa ilang pagsayaw.

Ang cluster 2 nga gilangkoban sa contingent sa barangay Centro , Guizo ug barangay Looc mao usab ang  nahimong  first runner up ug gisundan  sa cluster 3 gikan sa barangay Maguikay,  Bakilid, Cabancalan ug barangay Casuntingan.

Ang cluster 3 mao usab ang nakadaug isip labing maayo nga mosayaw   samtang  best andas  ang  nadawat  nga award   sa barangay Paknaan.

Ang choreographer sa Cluster 1  nga si Jefferson Gitgano mao usab ang giila nga best choreographer   kinsa maoy  choreographer sa Haladaya Festival sa Daanbantayan nga mananaug isip champion sa 2008 ug 2009.

Si Mayor Jonas Cortes kinsa maoy personal nga mitunol sa ganti sa mga mananaug sa maong indigay nanghinaut nga ang Panagtagbo Festival sa dakbayan labi pa nga mabulokon  sa sunod nga katuigan.

Ang unang ganti  nakadawat og P100,000, ikaduhang ganti P50,000 ug ang ikatulo  P25,000 uban  sa tropeyo  nga nadawat  sa matag  usa. (BANAT NEWS)