King kobra naa na sa City Zoo

CEBU, Philippines - Nahipos na  kagahapon  sa buntag sa  mga  tinugyanan  sa Cebu City Zoo  ang King Cobra  nga nadakpan didto  sa bukirang  barangay  sa dakbayan  sa Sugbo  sa milabay  nga semana.

Si Giovanie Stephen Romarate, Animal Keeper III  ug   manager  sa Cebu City Zoo  mibutyag  sa Banat News  nga bata  pa  ang maong King Cobra , usa ka  baye nga may  gitas-on  nga 48 pulgadas  ug  2 pulgadas  usab  ang  gidak-on    sa lawas

Matud  pa ni Romarate  nga  tungod  sa kaluya  na   sa maong  bitin, ila  kining  atimanon  pag-ayo  pinaagi  sa pagpainom  og tambal  ug  pagsilbi  usab  og pagkaon  nga gikinahanglan  sa lawas  niini.

Samtang  si Dr. Ed Llamedo, tigpamaba  sa Department  of Environment  and Natural Resources (DENR)7 nagkanayon  nga  gitugyan  nila  ang maong  King Kobra  ngadto  sa taga Cebu City Zoo  tungod  kay  kompleto  kini  og mga kahimanan  sa pag-atiman  sa maong  ihas  nga  hayop.

Gipasabot niya  sa  Banat  News  nga ang Cebu City Zoo  may wildlife farm permit  sulod  sa lima  ka tuig  nga giluwat  sa DENR  busa  takus  kaayo kini  nga moatiman  sa  mga  ihas  nga  mga mananap, mopadaghan niini  ug mopreserbar  alang  sa  mga  sayantipikanhong  panginahanglan.

Sayo  sa buntag  kagahapon  naghiusa  ang  mga  tinugyanan  sa DENR  ug  Cebu City Zoo  sa  pag-adto sa Sirao  diin  didto itangkal  ang  maong  Cobra  nga  nadakpan  sa  mga  mag-uuma  niadto  pang  ikatulong semana  sa Oktobre  ning  tuiga.

Sila si Norman Jade Ardosa, 19, Harris  Tudtud, 19, Rodelio Bonghanoy, 28, ug Jerwin Cobrado, 20, kinsa  pulos  ulitawo  ug  pulos taga  Sirao  nanulo  og  baki  didto  sa sapa  sa barangay  Malubog , kasikbit  sa Sirao  dihang  nadakpan  nila ang  maong  King Kobra.

Gumikan  niini  ila  kining  gidala  ngadto  sa Sirao ug  gisulod  sa tangkal apan  gumikan s a ilang kabalaka  nga makapahit kini  og tawo,  mitawag  sila  sa Banat News  aron  ipakuha  sa DENR  ang  maong  has.

Gituohan    nga gumikan sa kabugnaw sa   maong  mga  lugar  ug daghan  pa og  mga lasang  ug  mga langob,   anaa  ang  mga  ihas  nga  bitin  sama  sa King Cobra magpuyo  sa maong  mga dapit.

Sayo ning  tuiga  ang  unang  King Cobra  nga nadakpan  ni Reynaldo  Abenturado, usa ka  trabahante  sa Cebu City Zoo, mihambat ug mipahit  kaniya  ug  nasalbar  siya  gikan  sa kamatayon  dihang  natambalan  siya  sa tambal  gikan  sa isla  sa Camiguin  nga boluntaryong  gikuha  didto  ni anhing Pilot Capt. Jessup Bahinting.

Ang taga  DENR  padayon  nga  miawhag  sa mga  molupyo  sa kabukiran  sa   pagpahibawo  dayon kanila  kun  may madakpan  sila  nga  ihas  nga mananap  aron  ila  kining maatiman  apan  kinahanglang  magbantay  nga  dili mapaakan  niini.

(BANAT NEWS)