TF Alpha patabangon sa CITOM

CEBU, Philippines - Ang tsirman sa Cebu City Traffic Operations Management (CITOM) Board nga si Sylvan “Jack” Jakosalem misugyot nga patabangon nila ang mga sakop sa LTO Task Force Alpha sa pagpahapsay sa trapiko dinhi sa dakbayan.

Si Jakosalem namahayag nga kuwang gyud ang gidaghanon sa   ilang mga traffic enforcers nga mobantay sa dul-an sa usa ka gatos ka mga major intersections dinhi sa dakbayan sa Sugbo.

Ang CITOM aduna lay 289 ka traffic enforcers, apan gihulagway nga mapanagan-on kaayo nga modakop sa mga malapasong drayber.

Ang kadagkoan sa LTO-Task Force Alpha (TFA), usa ka non-government organization nga gihatagan og pagtugot sa LTO-Central Office nga makatabang sa ilang mga regular road law enforcers, miingon nga tun-an pa nila kun sanongon ba nila ang awhag ni Jakosalem.

Daghang drayber miangkon nga morespetar sila sa mga sakop sa Task Force Alpha kay sinsero kini nga manakop ug dili modawat og mga suborno sa ilang madakpan.

Giangkon sa kadagkoan sa CITOM nga makadawat sila’g mga tabi-tabi nga adunay pipila sa ilang mga sakop nga nagpabadlong kay modawat og kwarta gikan sa madakpang mga drayber.

Ang kadagkoan sa Task Force Alpha dili modawat og mga sakop kun wala kini maayo nga trabaho nga arang-arang og sweldo o kaha negosyo aron pagsiguro nga dili sila mangwarta sa kadalanan.

Si Jakosalem miangkon nga wala gyud masumpo sa CITOM ang mga dispatchers ingon man ang “watch your car” boys kay ang ilang giatiman mao ang pagpahapsay sa trapiko.

 Hinuon si Jakosalem miingon nga trabaho gyud unta kini sa kapolisan nga mao ang pagpatuman sa ordinansa sa siyudad.

Dunay sugyot nga patas-an ang multa sa madakpan sa paglapas sa anti-dispatching ordinance aron mahadlok ang mga dispatser ug moundang sa ilang kalihukan apan wala matuman. () (BANAT NEWS)