CMS kaabag sa DOH pag-atiman sa panglawas

CEBU, Philippines - Sa tinguha nga mapausbaw ang kahimsog sa panglawas sa katawhan, ang Cebu Medical Society (CMS) ubos sa Philippine Medical Association (PMS) nangusog sa pagpatuman og mga nagkadaiyang adbokasiya.

Lakip sa maong adbokasiya nga ilang gustong ipatuman mao ang paghatag og igong kaalam sa katawhan kalabot sa hustong paggamit sa mga tambal   batok sa mga nagkalain-laing sakit sa lawas.

Matud pa ni Dr. Mariah Dinopol, kanhi presidente sa CMS atol sa Special Kapihan sa PIA didto sa buhatan sa Department of Health (DOH) 7 nga adunay mga tambal nga maayong tomaron ug aduna usay mga tambal nga dili angayang tomaron kay makadaot sa lawas sa tawo.

Dugang pa niya nga kinahanglang adunay igong kaalam ug usab pagmatngon ang publiko ug angay sayron   ug sabton ang mga sakit nga angayang dapatan sa nagkalain-laing tambal.

Gitataw usab ni Denopol nga ang publiko kinahanglang magbantay sa mga ipagawas nga mga pahinumdom sa telebisyon ug radyo kalabot sa mga tambal sa sakit tungod kay adunay uban niini nga magpataka lang sa paghatag og impormasyon ngadto sa publiko.

"Kung moingon gani nga cure all buot ipasabot niana fake na siya", kini mao ang pamahayag ni Denopol.

Samtang sumala pa usab ni Dr. Marlon T. Co, bise presidente sa CMS nga kinahanglang kahatagan og hustong impormasyon ang publiko bahin sa mga tambal nga ilang tomaron aron nga dili disgrasya ang ilang dangatan.                

Samtang ang Department of Health (DOH) 7 andam usab nga mosuporta sa mga proyekto sa CMS, ug gani mapasalamaton kaayo si DOH-7 Regional Director Dr. Asuncion Anden tungod sa mainitong pagtabang sa CMS sa pagpausbaw sa maayong panglawas sa publiko.

Gipasalig niya nga ila gayung suportahan ang bisan unsang proyekto sa CMS kay katabang kini sa gobiyerno sa pagserbisyo sa publiko. (BANAT NEWS)