KBP gihagit kalikopan ikampanya

CEBU, Philippines - Gitahasan ni manlalaban Antonio Oposa Jr., usa ka inilang environmentalist nga Sugboanon, ang Kapisanan ng mga Brodkaster ng Pilipinas (KBP) Cebu Chapter nga motabang sa kampanya sa pagprotehir sa environment kun tuburan sa kinabuhi.

Si Oposa kinsa usa sa mga sponsor sa oathtaking seremony sa mga bag-ong opisyal sa KBP didto buhatan sa PAGCOR sa Waterfront Cebu City Hotel sa miaging Sabado sa gabii nagkanayon   nga dako kaayo og papel ang media alang sa maong kampanya sanglit sila maoy direkta nga makahatag og impormasyon sa katawhan ug sa pag-edukar sa publiko.

 “Kamong mga maninibya, sama ra mo nga usa ka magtutudlo, kay kamo maoy mopahibalo sa katawhan kung unsa ka importante ang pag-protehir sa atong kalikopan,” mensahe pa ni Oposa atol sa oathtaking ceremony sa mga bag-ong opisyales sa KBP-Cebu Chapter nga gipangulohan ni Marlon Baula sa Hot FM ug Easy Rock.

Dugang pa ni Oposa nga nag-atubang sa kuyaw nga kahimtang ang Sugbo kung padayon nga mag-abusar ang katawhan pinaagi sa paglabay bisan asa sa basura.

Kini tungod kay matud pa niya mao kini hinungdan sa pag-usab-usab sa klima sa panahon nga inigbusagak sa kusog nga uwan mapundo ang tubig sa kapatagan ug mobaha ang kasapaan tungod kay napuno na sa tubig ang kalibotan

Dugang pa ni Oposa nga dako usab kaayo og nahatag nga kaayohan sa kalikupan ang nagkadaiya nga road revolution nga gihimo dinhi sa Sugbo, nga sama usab sa gibuhat sa ubang mga dapit sa Pilipinas.

Ang road revolution motak-op sa pinili nga mga dalan aron gamiton nga agianan sa mga tawo ug sa mga bisekleta.

Gani gipaluya niya ang katawhan dinhi sa nasud gikan sa pagpamalit og sakyanan sama sa mga katawhan sa taga Netherlands ug uban pang nasud nga naugmad na kansang mga molupyo gikan sa presidente sa nasud ug mga dagkong opisyal sa ilang goberno kusog kaayong moangkas og biseklita ug panagsa nalang kaayo mosakay sa ilang mahalong sakyanan.

Matud pa ni Oposa nga iya usab kining ipresentar sa mga seminar didto sa ubang nasud aron daghan na unya ang maingganyo sa pagsunod niini. 

Sa bahin sa KBP, mahinangpon niining gidawat ang maong hagit ni Oposa. (/WC)(BANAT NEWS)