3 ka baboy'ng ilegal nga giihaw sakmit

CEBU, Philippines - Gisakmit sa mga inspector sa City Veterinarian Office ug sa City Health Office sa dakbayan sa Mandaue ang tulo ka mga baboy nga ilegal nga giihaw sa karaang ihawan sa sitio Asinan sa barangay Mantuyong sa dakbayan sa Mandaue sa miaging hapon.

Si Dr. Daisy Penetrante nga maoy city veterinarian officer uban sa mga kawani sa city health sa maong dakbayan maoy misakmit sa maong mga inihaw nga baboy pinaagi sa hiniusang   operasyon nga ilang gipahigayon.

Sa pakisusi nga gihimo ni Dr. Penetrante nasuta nga ang maong mga baboy   wala ma-inspection sa mga meat inspector sa maong dakbayan.

Dugang pa niya nga dili luwas ipakaon sa tawo ang karne sa baboy, baka, kanding ug baka kun wala kini ma- inspection sa mga meat inspector nga gidestino sa legal nga ihawan sa barangay Labogon sa maong dakbayan.

Gitataw ni Penetrante nga ang karne nga baboy nga ilang nasakmit ilang gituohan nga dili pa dugay nga giihaw kay lab-as pa kaayo ang dugo nga gatulo gikan sa mga lawas sa inihaw nga baboy nga gipanglabay ngadto sa basurahan.

Nagtuo si Penetrante nga gidali-dali ang paglabay sa maong dugo human sila masigpati nga nagdanga-danga na sa maong lugar.

Gani miingon siya nga mikabad og panagan ang mangingihaw dihang nakit-an sila nga nagpanon aron pag-inspection sa giihaw nga mga hayop.

Dihang ila kining gitimbang   mikabat ang tanan og   250 ka kilo busa ila dayon kining gipa-blotter sa buhatan sa kapolisan.

Gipasabot ni Dr. Penetrante nga ang pag-ihaw og hayop sama sa kanding, kabaw, baka, baboy ug uban pa nga wala mag-agi sa inspection sa National Meat Inspection Commission usa ka kalapasan sa Republic Act 9296.

Dugang pa niya nga mailhan ang karne nga nag-agi sa inspection sa mga inspector sa NMIC sa nasud tungod kay gawas nga adunay dokumento nga ikapakita ang tag-iya, ang karne sa hayop nga inihaw adunay tatak nga mopamatuod nga luwas kini kaonon sa tawo.  (BANAT NEWS)