Kapitan sa brgy. gipusil angol sa silingan

CEBU, Philippines - Naangol ang usa ka kanhi barangay captain human kini pusila sa silingan niya nga   nagdumot kaniya didto sa barangay Sacsac, lungsod sa Dalaguete kagahapon sa kaadlawon.

Si PO2 Cirilo Glipa sa Dalaguete Police Station miila sa biktima nga si Ademar Quilaton, 59, kanhi kapitan sa barangay Sacsac.

Samtang ang suspetsado mao usab si Romulo Gamboa alias Junjun, hingkod,  nga silingan sa biktima.

Sumala kang PO2 Glipa nga ang biktima mibilar sa haya sa iyang kanhi konsehal sa barangay dihang kalit lang miabot ang suspetsado nga hubog.

Matud pa ni PO2 Glipa nga gumikan kay walay estorya ang suspetsado wala lang usab magtagad ang biktima niini, dihang kalit lamang siyang gipusil sa suspetsado makatulo ka higayon.

Nasabak sa bala ang hawak sa biktima ug dali kining gidala ngadto sa tambalanan sa dakbayan sa Sugbo.

Gituohan sa kapolisan nga pagdumot ang hinungdan sa maong pagpamusil ug sa pagkakaron padayon pa nilang gipangita ang suspetsado kinsa misibat   dayon human sa maong hitabo. (BANAT NEWS)