Toledo PNP may lead na sa tulisan

CEBU, Philippines - Duna nay lead ang kapulisan sa dakbayan sa Toledo sa usa sa duha ka tulisan nga mitulis ug mipusil patay sa babayeng negosyante niadtong Lunes sa gabii diha sa sitio Das sa barangay Don Andres.

Si Supt. Julian Entoma, hepe sa Toledo City Police Station nga nahinabi sa Banat News nagkanayon nga ang mga saksi makaila gyud sa usa sa mga tulisan nga maoy mibunlot sa bag ug mipusil sa biktimang si Maria Belen Santillan, 59, tag-iya sa Santillan Enterprises.

Matud ni Entoma miingon kaniya ang mga saksi nga maglisod sila pag-ila sa drayber sa motorsiklo tungod kay human nakuha sa kaubang tulisan ang bag mipasirit kini dayon paingon sa barangay Cantabaco.

Wala gisalikway ni Entoma nga mga local boys lang ang duha ka tulisan ug taga diha ra sa lugar o kaha kasikbit nga mga lugar sa nahitaboan sanglit nakahibawo man sa lihok sa biktima. Subay sa nahipos nga impormasyon ni Entoma gikan sa pamilya sa biktima nga ni-withdraw ang biktima sa bangko og P500 mil kay duna kini paliton nga yuta nga nagkantidad og P700 mil karung Sabado o sa Domingo na. Apan ang maong kantidad giingong gigamit una sa pagpang-ilis sa mga checke sa mga magtutudlo.

Gibana-banang mokabat sa P1.2 milyones ang kinatibuk-ang nadala sa mga tulisan lakip na niini ang mga cheke nga naa pay to cash ug post dated checks.

Si Santillan patay diha dayon human gipusil makaduha ka higayon sa tulisan dihang nakigbinunlutay kini sa iyang bag nga gisudlan sa cash ug tseke.  (BANATNEWS)