Resolusyon sa CCAIB gisaway sa mga organizers

CEBU, Philippines - Gisaway dayon ug gipaabot nga moani pa og mga pagsupak gikan sa mga events organizers ang resolusyong gilaraw sa Cebu City Anti-Indecency Board (CCAIB) sa pagdili sa mga kandidata sa beauty pageant nga magsul-ob og bikini.

Ang coordinator sa Lesbian, Gay, Bisexual and Transgender (LGBT) Community sa Sugbo nga si Mikay Dumaboc misaysay nga supak sila sa gi-propose nga resolution sa CCAIB.

Ang CCAIB giingong misugyot nalang nga imbes swim wear himuon nalang kining sports wear.

Apan si Dumaboc misaysay nga wala’y dautan ang presentasyon niini ug dili law-ay.

“Kung moana ka og swim wear, depende raman gyud na kung unsaon pagdala sa tawo. Dapat wholesome ang pag-present, dili law-ay tan-awon,” matud pa ni Dumaboc.

Nasayran nga ang CCAIB nanawagan sa opisyales sa 80 ka mga barangay sa siyudad nga tabangan sila sa pag-monitor sa nagkadaiyang beauty pageants lakip na niini ang mga Miss Gay pageants.

Buot sa CCAIB nga idili sa maong mga pageants ang swim wear competitions. Pipila sa mga konserbatibo ang mikunsiderar niini nga usa ka matang sa pagpaubos sa dignidad sa kababayen-an, hinuon walay klaro ang ilang eksplinasyon kabahin sa mga bayot nga mag-swim wear sa kompetisyon.

“Ang beauty pageant lahi ra na siya kompara anang mga bikini shows nga law-ay gyud kaayo. Lain-lain man gyud nang perspective sa tawo, kung tan-aw sa uban nga bastos ang mag-swim wear, ang uban moana man pud nga dili,” dugang pa ni Dumaboc.

Giingong mihangyo usab ang CCAIB ngadto sa mga event organizers nga mo-coordinate gyud sa ilang buhatan ug sa barangay aron mahimoan og evaluation sa estado sa ilang show.

Ang gi-propose nga resolution sa CCAIB tun-an pa sa buhatan ni Mayor Michael Rama. (BANATNEWS)