50 ka quarantine inspector gipakatap

CEBU, Philippines - Human ipalibkas ni Kalihim Proceso Alacala sa Departmet of Agriculture ang pagdili sa pagbiyahe sa mga kahayopan ngadto sa lainlaing dapit sa nasud, ang   buhatan sa Cebu Provincial Veterinarian sa Kapitolyo mopakatap na sa 50 ka mga veterinarian, quarantine inspector ug   uban pang mga opisyal nga may labot niini ngadto sa 25 ka mga pantalan dinhi sa lalawigan sa Sugbo.

Kini aron sa pag-inspection sa mga kahayopan   nga mosulod dinhi sa lalawigan gikan sa nagkalain-laing lugar pagsuta kun wala ba kini sakit nga makamatay nga mananakod.

Pinaagi niini masiguro usab nga walay kahayopan nga masakiton nga makasulod dinhi sa lalawigan sa Sugbo.

Gitug-an ni Dr. Mary Rose Vincoy, ang pangulo sa Provincial Veterinarian’s Office nga andam na sa pagtuman sa ilang tagsatagsa ka mga obligasyon ang 50 ka mga   kawani sa iyang buhatan aron sa paghiling sa mga kahayopan nga itumod dinhi sa probinsiya sa Sugbo. Gipahibawo ni Vincoy nga ang maong mga personnel bag-ohay lamang nakahuman sa ilang subsob nga training alang sa pagsiksik sa mga kahayopan nga may sakit.

Midugang usab siya nga ilang gihimo ang maong lakang aron makahatag sila og kasiguroan nga luwas kaonon sa katawhan ang mga karne sa mga kahayopan   nga ihandos sa kamerkadohan dinhi sa Sugbo. (BANAT NEWS)