IDMB-MCPO gipasidunggan sa PRO-7

CEBU, Philippines -  Gipasidunggan sa bag-ong direktor sa Police Regional Police Office (PRO) 7 nga si Police Chief Superintendent Marcelo Garbo Jr. ang kapolisan sa Mandaue City Police Office (MCPO) gumikan sa pagkasikop sa suspetsado sa pagpusil patay sa usa ka sakop sa kapolisan sa lungsod sa Balamban.

Gipahigayon ang paghatag og pasidungog sa MCPO nga gipangulohan ni Senior Superintendent Noel Gillamac nga maoy direktor sa maong kuwerpo sa kapolisan human sa flag raising ceremony nga gihimo sa PRO-7 gahapon sa buntag.

Sa nasayran nga ang nadakpan nga si Dwight Carmelotis maoy suspetsado nga nagpusil kang PO1 Romeo Sasing sa kapolisan sa lungsod sa Balamban nga namatay human mabiktima sa pagpamusil nga nahitabo sa miagi pang tuig.

Si Carmelotis nadakpan sa Investigation Detection and Management Bureau (IDMB) sa MCPO diha sa barangay Cubacub human sa nahitabong pag-ambus patay sa negosyante nga si Antonio Ouano sa miaging Hulyo niining tuiga. (BANAT NEWS)