Gidul-itan pagpusil patay
CEBU, Philippines — Patay ang usa ka lalaki human gipusil sa wala pa mailhing suspek sa Sitio Ibaan, Barangay Kasambagan, Cebu City, Biyernes sa kaadlawon.
Ang biktima giila nga si Ricardo Ontong Jr., alyas “Ampre,” residente sa maong lugar ug lumad sa Compostela, Cebu.
Matud sa inisyal nga imbestigasyon, giingong adunay kaestorya ang biktima sa wala pa siya gipusil.
Upat ka masipang buto sa armas ang nadungog sa mga tawo, gidul-itan pagpusil ang biktima kaupat diha sa iyang ulo nga maoy hinungdan sa iyang kamatayon.
Human sa pagpamusil, dali nga misibat ang wala pa mailhing suspek nga misakay sa motorsiklo.
Sa pagproseso sa crime scene, nakarekober ang Scene of the Crime Operations (SOCO) og mga basiyo sa bala nga kalibre .45 nga mahimong makatabang sa imbestigasyon.
Padayon ang imbestigasyon sa kapulisan aron mailhan ang suspek ug matino ang motibo sa pagpamusil. — /IBM (BANAT NEWS)
- Latest
