Polis wala pa kasulbad sa kamatayon sa driver

CEBU, Philippines - Nagpabiling blangko ang kapolisan sa lungsod sa Alcantara pagtumbok sa duha ka kriminal nga mibanhig patay sa usa   ka drayber sa V-hire ug pagkaangol sa pasahero niini didto sa Poblacion sa maong lungsod sa miaging Lunes.

Si SPO2 Brendo Beriarminte, imbistigador sa Alcantara Police Station mibutyag sa Banat News nga naglisud sila karon pag-ila sa duha ka kriminal nga mipatay kang Victorino Torino , hingkod, ug minyo, tungod kay   walay nakatimaan sa panagway sa maong mga tawo.

Hinuon naa na   sa kapolisan ang helmet ug ang jacket nga kolor blue nga gisul-ob sa gun man human kini ilabay didto sa sementeryo sa barangay Palanas sa lungsod sa Ronda    nga napunitan sa mga tanod ug mitunol niini   ngadto sa buhatan sa kapolisan sa Alcantara.

Matud pa ni SPO2 Beriarminte nga padayon karon silang nakig-alayon sa kapolisan sa lungsod sa Argao human itumbok sa mga saksi nga didto mopaingon sa bukirang bahin sa Argao ang motorsiklong gisakyan sa duha ka killer.

Midugang si SPO2 Beriarminte nga gikonsiderar nila karon ang tanang anggolo aron sa pag-establisar sa motibo sa kremin sanglit bisan ang asawa sa biktima mitug-an sa kapolisan nga wala siya’y namatikdan nga may kontra ang iyang bana sa wala pa ang hitabo.

Sa pagkakaron gipaningkamotan sa kapolisan ang pag-establisar sa cartographic sketch sa mga mga kriminal basi usab sa description nga gipadayag sa mga saksi.

Kulang og pagtuo ang kapolisan nga taga lungsod sa Alcantara ang mga mipatay apan sigurado sila nga personal ang hinungdan sa krimen sanglit ang biktima ra man maoy gi-target niini. Atol sa maong hitabo may 12 ka pasahero ang biktima ug usa niini ang naangol kay tupad siyang naglingkod sa biktima ug nalasikan sa bala gikan sa armas sa mipatay.

Si Torino namatay dihadiha human kini masabak   sa tulo ka bala sa iyang ulo, dughan ug lawas. (BANAT NEWS)