Paghatag priority number gisagop sa NBI

CEBU, Philippines - Ang kadagkoan sa National Bureau of Investigation (NBI) may solusyon na aron madali ang usa ka aplikante  pagkuha og clearance gikan sa ilang buhatan pinaagi sa paghatag og priority number sa mga hingtungdan.

Matud pa ni kapitan Manuel Guanzon sa barangay Capitol, dakbayan sa Sugbo diin nahimutang ang buhatang rehiyonal sa NBI nga siya maoy nagpaila ug mirekomendar ning maong sistema  human niya estudyohi ang tukmang paagi    aron nga madali lang ang pagluwat og clearance sa mga manlukatay niini.

Matud pa ni Guanzon nga ang paghatag og priority number nga may petsa kun kanus-a makuha sa usa ka aplikante ang iyang gikinahanglang clearance   maoy ilang nahuna-hunaang   sulbad   sa sulirang dugay nang giatubang sa NBI.

Matud pa ni Guanzon nga matag adlaw makaluluoy kaayo tan-awon ang tag-as kaayong linya sa mga manlukatay og NBI clearance nga mag-agwanta sa uwan ug init, nga magbarog sa yuta subay sa kutay sa linya sa mga aplikante niini.

Midugang si Guanzon nga ang priority number gimarkahan na og petsa kun kanus-a mobalik ang usa ka aplikante sa maong buhatan nga dili na kinahanglang molinya pa.

Gihulagway ni Guanzon nga usa ka appointment sa usa ka aplikante og NBI clearance ngadto sa buhatan sa NBI ang iyang paglukat niini. 

Samtang sa bahin ni Regional Director Edward Villarta sa NBI7 mapasalamaton kaayo kang kapitan Guanzon nga nakapaila og tukmang solusyon sa problema nga dugay na nilang gisagubang.

Nakab-ot ang maong solusyon dihang gibati og kaluoy ang mga molupyo sa palibot sa buhatan sa NBI bahin sa ubang mga aplikante og NBI clearance nga gikan sa lagyong lugar nga anha nalang matulog sa palibot sa maong NBI office magpaabot sa ilang turno sa paglukat og clearance.