Waiter gipusil sa gidudahang tulisan
CEBU, Philippines - Usa ka waiter gipusil angol sa usa sa tulo ka wala hiilhing lalaki nga iyang gisuspetsahang tulisan sulod sa public utility jeep (PUJ) sa dalan M.J Cuenco Avenue sa barangay Lorega San Miguel siyudad sa Sugbo sa miaging gabii.
Ang biktima mao si Randolf Bentolan Cabongcal, 27, ulitawo, usa ka waiter, nga taga sitio Lahing-Lahing sa barangay Mabolo.
Segun sa pasiunang imbestigasyon sa Homicide Section sa Cebu City Police Office (CCPO) nila ni SPO4 Alex Dacua ug mga kaubanan nasayran nga ang biktima nagsakay sa PUJ paingon sa Mabolo gikan sa iyang trabahoan.
Apan pag-abot sa maong lugar may tulo ka tawong wala hiilhi nga nagbarog ug mipara sa jeep nga gisakyan sa biktima.
Sulod sa sakyanan natahap ang biktima nga mga tulisan ang tulo, busa gihunghongan niini ang konduktor nga magbantay ug pahibaw-on ang ubang mga pasahero.
Apan dihang nasayran sa tulo nga gisuspetsahan silang tulisan, misilaob ang kapungot niini ug usa kanila milanit sa iyang armas de fuego dayong pusil sa biktima
Si SPO4 Rey Cuyos nga sakop sa Homicide Section nga nagpuyo duol sa nahitaboan daling miadto sa crime scene ug maoy midala sa tambalanan sa biktima aron katambalan ang mga samad sa bala sa nagkalainlaing bahin sa iyang lawas.
Samtang ang tulo ka gidudahang tulisan daling nanagan palayo sa maong lugar ug wala na maabti sa kapolisan. (WC)(BANAT NEWS)
- Latest
- Trending
