Pagpanigarilyo i-ban sulod sa TCJ

CEBU, Philippines - Ang Talisay City Jail higpit na nga mo-ban sa mga sigarilyo ug manigarilyo matud ni Chief Inspector Renante Rubio, jail warden sa maong bilanggoan.

Si Rubio nga nahinabi sa Banat News kagahapon nagkanayon nga gipatuman niya ang programa sa Bureau of Jail Management and Penology (BJMP) nga mao ang “no smoking in jail” o higpit nga pagdili sa mga manigarilyo diha sulod sa jail.

Gibutyag ni Rubio nga sa milabay’ng semana nakadawat siya og memorandum gikan sa national nila nga buhatan kabahin sa maong programa.

Sa pagpatuman sa maong programa ang tanang mga receptacle ug mga ash tray iyang gipangkuha ug gipanghipos.

Ang iyang mga personnel ug mga piniriso iyang gitigom aron mapahibawo ang maong kamanduan.

Matud usab ni Rubio nga sa una medyo dunay pagsupak ang mga piniriso tungod kay ang sigarilyo usa sa ilang panginabuhian.

Sa maong sitwasyon gitanyagan ni Rubio ang mga piniriso nga magpasulod og videoke aron sila magkanta-kanta ug ang kita niini adto lang sa mga piniriso.

Sa pagkakaron gitugotan una niyang mahurot og baligya ang mga stocks nga sigarilyo sa mga piniriso ug sa sunod semana higpit na nga ipatuman ni Rubio diha sa sulod sa TCJ ang pagdili sa pagpanigarilyo ug sa sigarilyo.

Ang mga personnel lakip siya nga warden kung gusto silang manigarilyo kinahanglan silang mogawas sa koral sa city jail. Ang kadtong mga mobisita usab nga magdala og sigarilyo imbargohon nila ang dala niini.

Si Rubio midugang nga base sa report sa Department of Health (DOH) nga 35,000 ka mga Filipino ang namatay matag tuig tungod sa sakit gumikan sa pagpanigarilyo.

Ug base usab sa report sa World Health Organization (WHO) sa napulo ka mga namatay duha niini dunay kalambigitan sa panigarilyo. (BANAT NEWS)